Ölkədə elektromobillərin artması benzinin qiymətinə təsir edəcəkmi? — AÇIQLAMA

SƏNAYE VƏ ENERGETİKA 17 noy 2022, 14:45
“Elektrik mühərrikli avtomobillərin satışının 2022-ci il 1 yanvar tarixindən ƏDV-dən azad edilməsi onları alıcılar üçün cəlbedici etmişdi, yeni qərara əsasən elektromobillərə tətbiq edilən 15% idxal gömrük rüsumu da ləğv edildi. Ümumiyyətlə bu ilin əvvəlindən ölkədə elektrik mühərrikli avtomobillərin satışlarında artım var idi və onları küçələrdə daha mütəmadi görmək olur”. 

Bu fikirləri Demokrat.az-a açıqlamasında nəqliyyat eksperti Fərid Hüseynov deyib. Ekspertin sözlərinə görə, son verilən qərar elektromobillərə olan marağı daha da artıracaq:

“İlin əvvəlindən bu yana ölkədə sırf elektrik mühərrikli avtomobil istehsal edən bir neçə şirkətin satış mərkəzləri fəaliyyətə başlayıb və alıcılara fərqli modellər təklif edirlər. 15%-lik idxal gömrük rüsumunun ləğv edilməsi ölkədə elektromobillərin daha da artmasına səbəb olacaq. Artıq alıcılar da "yaşıl avtomobillər" haqda məlumatlıdırlar və bu qərar bu tip avtomobil almaq istəyənlər üçün lap "göydəndüşmə" oldu. Satışlar mütləq artacaqdır. Qiymətlərin artması ilkin mərhələdə olmamalıdır, amma bir müddət sonra elektromobil qiymətlərində az faizlərlə artım gözləmək olar. Buna səbəb tələbin artması fonunda təklifin limitli sayda olması olacaqdır. Nəzər alsaq ki, hazırda avtosənayedə qlobal olaraq yarımötürücü problemi qalmaqdadır, eyni zamanda qlobal olaraq elektromobillərə tələb artır, onda bizim ölkənin payına düşəcək kvotanın azlığı qiymətlərdə artmaya səbəb olacaq”. 

Ekspert hesab edir ki, ölkədə elektromobillərin artması benzinin ucuzlaşmasına səbəb olmayacaq:

“Əvvəla nəzərə almaq lazımdır ki, elektromobillərin sayı artdıqca onları şarj etmək üçün lazımi infrastruktur tam olaraq yoxdur. Bakıdan kənarda isə bu özünü daha çox büruzə verir. Bu da özlüyündə istər-istəməz bölgələrdə, həmçinin paytaxtda ənənəvi avtomobillərin hələ də əsas nəqliyyat vasitəsi olaraq qalması deməkdir. Başqa səbəb isə ölkəmizdə yanacağın qiymətlərinin neftin dünya bazarındakı qiymətinə müvafiq olmadan tənzimlənməsidir. Bizdə yanacaq qiymətlərini bazar tənzimləmir, qiymət bir mərkəzdən təyin edilir və bu qiymətlərin ucuzlaşması üçün səbəb deyil”.

Qeyd edək ki, Dövlət Gömrük Komitəsinin məlumatına əsasən, elektrik mühərrikli minik avtomobillərinə tətbiq edilən 15 faiz idxal gömrük rüsumu ləğv edilib. Burada məqsəd alıcıların diqqətini ekoloji cəhətdən təmiz avtonəqliyyat vasitələrinə yönəltməkdən ibarətdir. Bildirək ki, 2022-ci il yanvarın 1-də yalnız elektrik mühərriki ilə işləyən nəqliyyat vasitələrinin idxalı ilə bərabər, satışı da əlavə dəyər vergisindən (ƏDV) azad edilib. Eyni tarixdə elektromobillər üçün ikinci və üçüncü səviyyə elektrik enerji doldurucularının idxalı və satışı da üç il müddətinə əlavə dəyər vergisindən azad olunub.

Aynurə
Demokrat.az



 

DİGƏR XƏBƏRLƏR

XƏBƏR LENTİ
06 dek 2022, 22:56
Top