Ermənistan Respublikasının bəzi kütləvi informasiya vasitələrində Azərbaycan Respublikasının vətəndaşının sərhəd pozucusu qismində saxlanılması barədə məlumat yayılıb.
Azərbaycan Dövlət Sərhəd Xidmətinin mətbuat mərkəzindən virtualaz.org-a verilən məlumata görə, bununla əlaqədar DSX bildirir ki, mart ayının 15-dən 16-a keçən gecə Azərbaycan Respublikası ərazisindən müqabil istiqamətdə 1 nəfər naməlum şəxsin dövlət sərhədini pozması qeydə alınmb, həmin şəxsin Qazax rayonunun Yuxarı Salahlı kənd sakini, 29.10.1986-cı il təvəllüdlü İbrahimov Elvin Arif oğlu olması müəyyən olunub.
Araşdırma zamanı həmin şəxsin ruhi əsəb xəstəliyi ilə əlaqədar 2-ci qrup əlil olması məlum olub. Hal-hazırda araşdırma işləri davam edir.
* * *
Ermənistan Müdafiə Nazirliyi Azərbaycan-Ermənistan sərhədini keçmiş Azərbaycan vətəndaşının saxlanılması barədə məlumat yayıb. Virtualaz.org Ermənistan KİV-lərinə istinadən xəbər verir ki, Ermənistan Müdafiə Nazirliyinin mətbuat katibi Artsrun Ovannisyanın sözlərinə görə, hadisə gecə saat 01:30-da baş verib.
Erməni hərbçiləri Azərbaycan tərəfdən yaxınlaşan adama atəş açıblar. Məlumata əsasən, o, ayağından yaralanıb və hospitala yerləşdirilib.
Ermənistan KİV-lərinin yaydığı informasiyaya görə, saxlanılan şəxsin üzərində Azərbaycanın Qazax rayonunun 1986-cı il təvəllüdlü sakini Arif İbrahimova aid sənədlər aşkarlanıb.