“Tofiq Yaqublunun həbsi ilə bağlı olan məsələyə bu formatda yanaşmaq lazımdır. Hadisə baş verib və hadisəyə hüquqi qiymət verilib. Məhkəmə ona cəza təyin edərkən kifayət qədər humanizmi nümayiş etdirməyib. Yəni ağır cəza verib. Son olaraq Tofiq Yaqublunun barəsində 4 il 3 ay həbs cəzası veriləndən sonra ictimai müzakirələr və müəyyən şəxslər tərəfindən etirazlar səslənməyə başlayıb”.
Bu fikirləri Modern.az-a Demokratiya və İnsan Hüquqları komitəsinin sədri, hüquq üzrə fəlsəfə doktoru Çingiz Qənizadə Tofiq Yaqublunun həbsi ilə bağlı sualı cavablandırarkən deyib.
Çingiz Qənizadənin sözlərinə görə, hadisənin necə baş verdiyini və istintaqın necə getdiyini müzakirə etmədən onun azadlığa çıxması yolları ilə bağlı məsələ üzərində düşünməliyik:
“Hüquq-müdafiə təşkilatlarının monitorinq qrupunun üzvü kimi eləcə də qrupda təmsil olunan Səadət Bənənyarlı, Səidə Qocamanlı, Novella Cəfəroğlu və digərləri hakimiyyət və hüquq müdafiəçiləri tərəfindən formalaşmış Işçi qrupunun üzvü kimi belə hesab edirəm ki, Tofiq Yaqublunun azadlığa çıxması üçün hüquqi müstəvidə iş aparılmalıdır. Küçələrə çıxıb etiraz aksiyaları və aclıq keçirtməklə müsbət nəticəyə nail olmaq çətindir. Təzyiqlərlə nə məhkəmə, nə də digər şəxslər heç bir güzəştə gedən deyillər. Həmişə monitorinq qrupunun üzvlərinin ortaya qoyduğu xəttə sadiq qalaraq hər bir şeyin sivil və danışıqlar formasında həllinə üstünlük verən biri kimi fürsətdən istifadə edib Tofiq Yaqubluya dərhal aclığı dayandırmağı xahiş etməklə bərabər, onu müdafiə edən şəxslərə üzümü tutaraq bu məsələlərdə sivil formadan kənar yollara əl atılmasının əleyhinə olduğumu bildirirəm”.
Komitə sədri onu da bildirib ki, məsələ ilə bağlı müəyyən təşkilatlara müraciət edəcəklər:
“Son olaraq onu qeyd etmək istəyirəm ki, İşçi qrupunun üzvləri Tofiq Yaqublunun cəzasının yüngülləşdirilməsi və daha yüngül cəza ilə əvəzlənərək onun azadlığa buraxılması üçün müəyyən işləri aparırıq. Yaxın vaxtlarda bununla bağlı müəyyən təşkilatlara müraciətlərimiz olacaq. Hesab edirəm ki, Tofiq Yaqublunun azadlığa çıxması üçün hüquqi müstəvidə aparılan iş öz müsbət nəticəsini verəcək”.
