Bir çox insan çirk və mikroblardan daha asan qurtulmaq üçün paltarları isti suda yumağa üstünlük verir.
Demokrat.az xəbər verir ki, yuma üzrə mütəxəssis Ceki Eşli “Martha Stewart” nəşrinə bildirib ki, müəyyən ləkə növlərinə bu üsulla yanaşmaq əks nəticə verə bilər.
Qan, tər, süd məhsulları, yumurta, ana südü və ya çiy ətdən ayrılan şirə protein tərkibli ləkələr hesab olunur və məhz bu ləkələr istiyə qarşı daha həssasdır.
“İsti su belə ləkələri sanki ‘bişirə’ bilər və nəticədə onların parçadan çıxarılması daha da çətinləşər”, deyə Eşli izah edib.
Ot, torpaq və bitki mənşəli ləkələr
Ot və torpaq ləkələrini də isti su ilə “müalicə etmək” məsləhət görülmür. Tərkibinə görə onlar protein mənşəli ləkələrə bənzər davranır.
Mütəxəssis əvvəlcə ləkənin yayılmasının qarşısını almaq üçün paltarı soyuq suda yaxalamağı tövsiyə edir.
Əgər söhbət qurumuş kirdən gedirsə, paltarın tamamilə qurumasını gözləmək, daha sonra qalıqları ehtiyatla çırpmaq və ya qaşımaq, yalnız bundan sonra yumaq daha məqsədəuyğundur.
Boya və mürəkkəb
Yağ əsaslı boya və mürəkkəb ləkələri də isti suyun təsiri ilə daha da çətin çıxarıla bilər. Piqmentin yayılmasının qarşısını almaq üçün parçanı tərsinə çevirmək və soyuq su ilə iç tərəfdən yaxalamaq tövsiyə olunur.
Belə paltarları digər əşyalardan ayrı yumaq daha yaxşıdır ki, boya digər geyimlərə keçməsin.
Şərab və tanin tərkibli içkilər
Qırmızı şərab və çay ləkələrini çıxarmaq xüsusilə çətindir. İstilik bu içkilərin tərkibində olan təbii birləşmələr – taninləri “möhkəmləndirir”. Nəticədə piqment parçanın liflərinə daha güclü hopur.
Meyvə və giləmeyvə
Pomidor və giləmeyvələrin tərkibində təbii boya maddələrinə bənzər birləşmələr olduğundan onlar da qalıcı ləkələr yarada bilər. İsti su bu ləkələri də boya kimi parçanın liflərində möhkəmləndirir.
Belə hallarda yumşaq ləkəçıxarıcılardan, məsələn, zərif maye qabyuyan vasitədən və ya adi süfrə sirkəsindən istifadə etmək olar. Lakin bu vasitələr mütləq soyuq su ilə birlikdə tətbiq edilməlidir.
Mütəxəssisin yekun qənaətinə görə, istənilən ləkəni isti su ilə yumaq istəyi çox vaxt əks nəticə verir. Sadalanan çirklənmə növləri ilə mübarizədə səbirli davranmaq daha məqsədəuyğundur: soyuq su ilə yaxalama, uyğun ləkəçıxarıcı vasitədən istifadə və ehtiyatlı yuma sevimli geyimi xilas etmək üçün ən yaxşı şansdır.
Jalə Demokrat.az
