“Qızıl top”a namizədlərin son reytinqinin açıqlanması futbol dünyasında müzakirələrə səbəb olub. Siyahıda dünya futbolunun tanınmış ulduzları yer alır.
Bəs namizədlərin hazırkı göstəriciləri “Qızıl top” uğrunda mübarizədə kimin daha şanslı olduğunu göstərir?
Futbol eksperti Arif Əsədov Demokrat.az-a açıqlamasında bildirib ki, burada ən şanslı namizəd Lamine Yamal görünür.
Onun sözlərinə görə, əgər üç namizədi Lamine Yamal, Rodri və Harry Kane-i , Rodri və Kane daha çox komanda oyunçuları kimi ön plana çıxırlar:
“Rodri daha çox yaradıcılıq, komandanın oyun istiqamətinin müəyyənləşdirilməsi və “qara işlər”də özünü göstərən futbolçudur. O, komanda oyununa ən çox xeyir verən oyunçulardan biridir. Müdafiə və hücum arasında balansın qorunmasında, oyunun qurulmasında və komandanın tempinin müəyyənləşdirilməsində mühüm rol oynayır.Həmçinin, Avropa çempionu adına layiq olan futbolçulardan biridir.
Harry Kane isə yaradıcılıq baxımından komandanın, belə demək mümkündürsə, qladiatoru, qol kralı kimi özünü göstərir. O, hücumları qolla yekunlaşdıran, sonluqda öz fərdi keyfiyyətlərini ortaya qoyan futbolçudur. Kane həm qol vurmaq, həm də hücumların qurulmasında iştirak etmək baxımından komandasına böyük fayda verir.
Amma Lamine Yamal daha çox fərdi keyfiyyətləri ilə seçilir. O, həm azarkeşlərin, həm də futbol ictimaiyyətinin böyük rəğbətini qazanır. Onun oyununa baxan insanlar daha çox futboldan zövq alırlar. Yamalın meydanda fərdi texnikası, sürəti və rəqib müdafiəsini yarmaq bacarığı onu digər namizədlərdən fərqləndirən əsas xüsusiyyətlərdəndir.
Bu baxımdan düşünürəm ki, Lamine Yamalın şansı daha çoxdur. Onun hazırkı performansı ilə yanaşı, gələcək potensialı da kifayət qədər yüksəkdir. Yamalın qarşıdakı illərdə dünyanın ən güclü futbol ulduzlarından birinə çevriləcəyi artıq indidən görünür.
O baxımdan düşünürəm ki, bu üç namizəd arasında Lamine Yamalın qalib olmaq şansı daha çoxdur”, - deyə şərhçi fikrini tamamlayıb.
