Ötən gündən başlayan güclü külək Bakı və Abşeron yarımadasında tozlu havanın yaranmasına səbəb olub. Bir çox ərazidə görünüş məsafəsi azalıb, hava dumanlı görünür.
Milli Hidrometeorologiya Xidmətinin rəsmisi Gülnarə Abbasova Demokrat.az-ın sorğusuna cavab olaraq bildirib ki, avtomatik stansiyaların məlumatına görə, havada tozun miqdarı normadan 1.4 - 1.7 dəfə çoxdur.
Onun sözlərinə görə, mənzərə yerli meteoroloji şəraitlə bağlıdır. Səhər saatlarından əsən güclü şimal-qərb küləyi torpaq səthindəki toz kütlələrini havaya qaldıraraq ətraf ərazilərə yayıb. Tozlu havanın sabah günorta saatlarınadək davam edəcəyi gözlənilir.
“Hazırda havada tozun miqdarı normadan 1,4-1,7 dəfə artıqdır. Havada müşahidə olunan toz meteoroloji şəraitlə əlaqədar lokal xarakter daşıyır. Belə hava şəraitinə bu gün səhər saatlarından başlayan güclü şimal-qərb küləyinin yerüstü quru səthində formalaşan toz kütlələrini ətraf ərazilərə yayması səbəb olub. Tozlu hava şəraitinin sinoptik vəziyyətlə əlaqədar sabah günorta saatlarınadək davam edəcəyi gözlənilir”.
