İşçi qrupun üzvü: "Sərhədlərin müəyyənləşdirilməsi məsələsində Rusiyanın vasitəçilik etməsinə ehtiyac yoxdur"


QARABAĞ 20 may 2021, 12:18
"Ermənistanda seçki ərəfəsində bir-birinə qarşı düşmən mövqedə olan, bir-birini qəti şəkildə qəbul etməyən çoxlu sayda müxtəlif qüvvələr prosesləri qızışdırırlar. Əslində, normal məntiqə görə, Rusiya da daxil olmaqla heç bir üçüncü qüvvə olmadan sərhədlər əlimizdə olan sənədlərə uyğun şəkildə müəyyənləşdirilə bilər".

Bunu Pravda.az-a açıqlamasında Milli Məclisin Azərbaycan-Rusiya parlamentlərarası əlaqələr üzrə işçi qrupunun üzvü Nəsib Məhəməliyev Azərbaycan və Rusiya prezidentlərinin 19 mayda baş tutmuş telefon danışığını şərh edərkən deyib.

Deputat bildirib ki, Azərbaycan-Ermənistan sərhədini müəyyən edən, 1974-75-ci illərdən qalmış konkret xəritələr var: "Sərhədlərin delimitasiyası və demarkasiyası bu xəritələrə istinadən aparılmalıdır. Qeyd edim ki, keçmiş SSRİ-nin müdafiə nazirliyinin baş qərargah rəisinin hazırladığı bu ən dəqiq xəritələrin surəti həm Azərbaycanda, həm də Ermənistanda var.

Sadəcə, problem ondadır ki, son 30 ildə ermənilərin işğal faktına görə, Azərbaycan-Ermənistan sərhədi olmayıb, ermənilər qanunsuz şəkildə məskunlaşma aparıblar və Livandan, Suriyadan, eləcə də başqa yerlərdən gələn erməniləri Qarabağda məskunlaşdırıblar. İndi isə onlar çox gözəl başa düşürlər ki, haqsızdırlar və sərhəd konkret xəritələrə uyğun şəkildə müəyyənləşdirilməlidir. Əgər sərhəd müəyyənləşdirilməzsə, hansısa gələcək əməkdaşlıqdan söhbət gedə bilməz. Ermənilərin mövcud vəziyyətlə barışmaq istəməmələrinə əsas təkan verən hadisə iyunun 20-ə növbədənkənar parlament seçkilərinin təyin edilməsidir. Seçki ərəfəsində bir-birinə qarşı düşmən mövqedə olan, bir-birini qəti şəkildə qəbul etməyən çoxlu sayda müxtəlif qüvvələr prosesləri qızışdırırlar. Əslində, normal məntiqə görə, Rusiya da daxil olmaqla heç bir üçüncü qüvvə olmadan sərhədlər əlimizdə olan sənədlərə uyğun şəkildə müəyyənləşdirilə bilər. Təbii ki, erməni cəmiyyətində psixoloji gərginlik hökm sürür, hələ də ağır məğlubiyyətin şokunu yaşayırlar və bu baxımdan, süni şəkildə ajiotaj yaradırlar".

N.Məhəməliyev hesab edir ki, sərhədlərin müəyyənləşdirilməsi məsələsində Rusiyanın vasitəçilik etməsinə ehtiyac yoxdur: "Onsuz da konflikt yaranan zaman Rusiya sülhməramlı kontingenti müdaxilə edir və problemi aradan qaldırır. İndi, sadəcə, ermənilərdən konstruktiv yanaşma tələb olunur. Paradoksal vəziyyət budur ki, indi həqiqəti söyləyən normal düşüncəli erməni belə, özünə düşmən qazanır. Cəmiyyət sağlam məntiqi qəbul etmək istəmir. Beləliklə, Ermənistan dövləti özündə güc tapıb xalqına izah etməlidir ki, torpaqlar bizə məxsus deyil. 1974-75-ci illərin xəritələrini ictimailəşdirməli və xalqını sakitləşdirməlidir. Əks halda, onlar heç vaxt dövlət ola bilməyəcəklər".

Demokrat.az


DİGƏR XƏBƏRLƏR

XƏBƏR LENTİ
Top