Pakistan prezidenti Azərbaycanı Qarabağın azad olunması münasibətilə təbrik etdi


XARİCİ SİYASƏT 14 yan 2021, 14:24
Pakistana rəsmi səfəri çərçivəsində yanvarın 14-də xarici işlər naziri Ceyhun Bayramov Pakistan İslam Respublikasının Prezidenti Arif Alvi ilə görüşüb.

Bu barədə Demokrat.az-a XİN-dən məlumat verilib.

Pakistan Prezidenti Arif Alvi Azərbaycan Respublikasının Prezidenti İlham Əliyevə səmimi salamlarını çatdırıb və Azərbaycan dövlət başçısını Pakistanda görməkdən məmnunluq duyacağını bildirib. O, Azərbaycanın ərazilərinin işğaldan azad olunması və əldə olunan Qələbə münasibətilə təbrik edib.

Arif Alvi Qoşulma Hərəkatının Bakıda keçirilən dövlət və hökumət başçılarının Zirvə toplantısında iştirakını və bu zaman Azərbaycan Respublikasının Prezidenti ilə görüşünü xatırlayaraq, Azərbaycan dövlət başçısının uzaqgörən siyasətçi olduğunu xüsusilə vurğulayıb.

Hər iki ölkənin regional münaqişələrin beynəlxalq hüququn prinsipləri əsasında həllinə dair mövqeləri və bu xüsusda nümayiş olunan qarşılıqlı dəstək qeyd olunub. Pakistan Prezidenti, həmçinin ölkələrimiz arasında ikitərəfli münasibətlərin inkişafı, o cümlədən iqtisadi, ticarət və digər sahələrdə əməkdaşlığın daha da genişləndirilməsinin vacibliyini vurğulayıb.

Nazir Ceyhun Bayramov, öz növbəsində Azərbaycan Respublikasının Prezidenti İlham Əliyevin səmimi salamlarını Pakistan dövlət başçısının diqqətinə çatdırıb. Pakistanın Azərbaycanın beynəlxalq hüquqa və ədalətə əsaslanan mövqeyinə verdiyi dəstəyi vurğulayan nazir, xüsusilə 44 günlük Vətən müharibəsi dövründə dost və qardaş ölkə Pakistanın nümayiş etdirdiyi birmənalı dəstəyə görə qarşı tərəfə təşəkkürünü ifadə edib.

Azərbaycanın Cammu və Kəşmir məsələsinin beynəlxalq hüquq norma və prinsipləri, həmçinin BMT TŞ qətnamələri əsasında həllini dəstəklədiyi və İslam Əməkdaşlıq Təşkilatının müvafiq kontakt qrupu çərçivəsində iştirakımız qeyd olunub.

Azərbaycanın işğaldan azad edilmiş ərazilərində bərpa və reabilitasiya işlərinin həyata keçirilməsindən bəhs edən nazir Ceyhun Bayramov hazırkı mərhələdə dost ölkələrin bu fəaliyyətə cəlb oluna biləcəyini qeyd edib.

Görüşdə tərəflər ikitərəfli əməkdaşlığın gələcəkdə daha da inkişaf etdirilməsi üzrə qətiyyətli olduqlarını ifadə ediblər.


X X X

Azərbaycanın xarici işlər naziri Ceyhun Bayramov Pakistan Prezidenti Arif Alvi ilə görüşüb.

“Report” “Dispatch News Desk” (DND) agentliyinə istinadən xəbər verir ki, Ceyhun Bayramov Azərbaycanın bütün beynəlxalq forumlarda Kəşmir məsələsində Pakistanı dəstəkləməyə davam edəcəyini söyləyib.

Bundan əlavə, azərbaycanlı nazir Pakistana Dağlıq Qarabağ məsələsində Azərbaycanın mövqeyini dəstəklədiyinə görə təşəkkür edib. O, həm Pakistan, həm də Azərbaycanın ikitərəfli ticarət və mədəni əməkdaşlığın genişləndirilməsi üçün böyük potensiala malik olduğunu vurğulayıb.

Prezident Arif Alvi Pakistanın Azərbaycanla ümumi inanc və mədəni əlaqələrə əsaslanan münasibətlərini yüksək qiymətləndirdiyini qeyd edib.

O, Azərbaycan hökumətini və xalqını Dağlıq Qarabağın azad edilməsi münasibətilə təbrik edib və Pakistanın Azərbaycanın ərazi bütövlüyünü dəstəklədiyini təsdiqləyib. Prezident Arif Alvi həmçinin ikitərəfli əmtəə dövriyyəsinin artırılmasının və iki ölkə arasında mədəni və ticarət əməkdaşlığının daha da inkişaf etdirilməsinin vacibliyini vurğulayıb.

Demokrat.az


DİGƏR XƏBƏRLƏR

XƏBƏR LENTİ
17 yan 2021, 01:27
16 yan 2021, 23:39
Top