“Bu addım iki ölkə arasında gələcəkdə yenidən münaqişə ehtimalını minimuma endirər”

Maka Boçorişvili ilə birgə mətbuat konfransında xarici işlər naziri Ceyhun Bayramov deyib ki, Azərbaycan və Ermənistan arasında yekun sülhə nail olunması üçün Ermənistanda referendum keçirilərək konstitusiyadan Azərbaycana qarşı ərazi iddialarını çıxarmalı, həmçinin ATƏT-in Minsk Qrupu ləğv edilməlidir. 

Mövzu ilə bağlı siyasi şərhçi Asif Nərimanlı Demokrat.az-a açıqlama verib. 

O qeyd edib ki, Ceyhun Bayramovun bu açıqlaması bir neçə strateji mesaj daşıyır:

“Azərbaycan üçün Ermənistanın konstitusiyasında yer alan ərazi iddialarının ləğvi real sülh müqaviləsinin əsas təminatıdır. Bu addım, iki ölkə arasında gələcəkdə yenidən münaqişə ehtimalını minimuma endirər və sülhün beynəlxalq hüquqa əsaslanan davamlı mexanizmlə qorunmasını təmin edər. Minsk Qrupu uzun illər Qarabağ münaqişəsinin həllində vasitəçi kimi çıxış etsə də, 2020-ci il müharibəsindən sonra bu mexanizm faktiki olaraq sıradan çıxıb. Onun ləğvi həm regionda yeni siyasi reallıqların rəsmi tanınması, həm də Azərbaycan və Ermənistanın birbaşa danışıqlar prosesinə keçməsi anlamına gəlir. Konstitusiyadan ərazi iddialarının çıxarılması Ermənistanda ciddi siyasi mübahisələr yarada bilər. Çünki bu, həm Ermənistan müxalifəti, həm də diaspor tərəfindən “tarixi iddialardan imtina” kimi qəbul oluna bilər. Referendum keçirilməsi Paşinyan hökumətinin siyasi iradəsinin və cəmiyyətin hazırkı mövqeyinin test olunması deməkdir. Əgər Ermənistan bu addımı atarsa, Azərbaycan-Ermənistan münasibətləri yeni mərhələyə qədəm qoya bilər. Bu, həm iqtisadi əməkdaşlıq imkanlarını, həm də regionda Zəngəzur dəhlizi kimi layihələrin reallaşma perspektivini gücləndirər”.

Leyla Turan
Demokrat.az