Xəbər verdiyimiz kimi, aprelin 5-də Azərbaycan Avtomobil Federasiyasının (AAF) təşkilatçılığı ilə “Offroad” – yolsuzluq avtomobillərinin yürüşü keçirilib.
“Qafqazinfo”nun məlumatına görə, Bakı-Xızı-Şamaxı marşrutu üzrə yürüş səhər saatlarında Heydər Əliyev Mərkəzinin qarşısından start götürüb.
Dağ yolları, palçıqlı cığırlar və nəfəskəsici yüksəkliklər…
Bu, adi sürücülərin qorxub uzaq durduğu mənzərədir. Amma “offroad” həvəskarları üçün bu yollar macəraya doğru gedir.
Onlarla danışdıqca həyəcan və gözləntiləri açıq şəkildə hiss olunurdu. Bəs bu çətin və həyəcanlı yürüş barədə birbaşa iştirakçılar nə düşünür?
13 yaşlı Osman Osmanlı deyir ki, ilk dəfədir belə həyəcanlı yürüşə qatılır:
“Atamın dostu ilə birlikdə Şamaxıya gedəcəyik. Çox həyəcanlıyam. Möhtəşəm bir tədbirdir. Belə yürüşlər avtomobil həvəskarları üçün çox yaxşıdır”.
Elmir Cəbrayılov da bu yürüşdə ilk dəfə iştirak edəcək şəxslərdəndi. Gözləntisi isə səfərin maraqlı keçəcəyidir:
“Düşünürəm ki, maraqlı keçəcək. İlk dəfə qatılıram. Daha öncə tək səfərlərim olub. Bu dəfə isə qrup halına yola çıxırıq. Bu səfəri daha da maraqlı edir”.
Yürüşdə Azərbaycan Avtomobil Federasiyasınün üzvləri ilə yanaşı, bu sahəyə maraq göstərən şəxslər, o cümlədən bir sıra məşhurlar da iştirak edib.
Müğənni Nigar Camal dəfələrlə iştirak etməsinə baxmayaraq yenə də həyəcanlı olduğunu bildirdi:
“Bu günlə bağlı çox həyəcanlıyıq. Əminəm ki, çox gözəl də keçəcək. Çünki hər il bu tədbirdə iştirak edirik”.
Marşrut boyu “Offroad” həvəskarlarını maraqlı sərgüzəştlər gözləyirdi. Səyahət blogeri Vahid Həsənov deyir ki, belə bir həyəcanı ilk dəfə yaşayıb:
“İlk dəfə idi ki, “Offroad” qrupu ilə bir yerdə harasa gedirdik. Ümumiyyətlə maşınım da buna tam hazırlıqlı deyildi. Lakin yolların öhdəsindən gəldi. Belə ir şey yaşamamışdım. Həyəcan dəhşət idi”.
.jpeg)
Həyat yoldaşı ilə birlikdə bu səfərə qatılan Həsti Həsənova isə bildirir ki, maşını Vahid idarə etsə də, onun həyəcanını çox yaxından hiss edib:
“Ən çox da həyəcanlanan mən idim. Bu maşınımızla ilk dəfə belə bir tura qatılırdıq”.
Belə ki, bu növ avtomobilləri idarə edənlər yoldakı çətinliklərə hazırlıqlarını nümayiş etdiriblər.
Bakıdan Xızıya qədər uzanan yol daha sonra Şamaxıya səfərlə sonlanıb. Çətinkeçilən yolları əhatə edən yürüş adrenalin dolu anlarla yadda qalıb.
Qeyd edək ki, yolsuzluq avtomobillərinin qatıldığı yürüşün keçirilməsində məqsəd avtomobil idmanının inkişaf etdirilməsi, həmçinin regionlarda avtomobil həvəskarlarının bu idman növünə cəlb olunmasıdır.
Azərbaycan Avtomobil Federasiyası avtomobil idmanı üzrə müxtəlif yarışlar təşkil etməklə yanaşı, mütəmadi olaraq “Offroad” sahəsini də diqqətdə saxlayır, yolsuzluq avtomobilləri üzrə müxtəlif yürüş və yarışlara dəstək göstərir.
