"Ramiz Mehdiyevi atam qədər istəmişəm" — Rasim Məmmədovdan SƏRT AÇIQLAMA

DAXİLİ SİYASƏT 12 sen 2022, 16:17
"Baku Steel Company” şirkətinin sabiq rəhbəri Rasim Məmmədovun cinayət işi üzrə məhkəmə prosesi keçirilib.

Demokrat.az
xəbər verir ki, bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə baş tutan prosesdə ifadə verən Rasim Məmmədov deyib ki, 2008-ci ildən "Baku Steel Company"də işləməyə başlayıb. 

Onun sözlərinə görə, 2011-ci ildə isə 30 milyon manat ödəyərək şirkətin tək sahibi olub: 

"Mən zavodu alanda elə vəziyyətdə idi ki, heç kimə lazım deyildi.Mənə heç kim pul ödəməyib, zavodu tək almışam".

Rasim Məmmədov qeyd edib ki, 2014-ci ildə zavodun fəaliyyətini tamamilə dayandırıb və  yenidənqurma işlərinə başlayıblar:

"Mənə deyirlər ki, zavodu talan eləmisən. Əksinə mən oranı düzəltmişəm. Əvəz Zeynallı da ancaq mənim pis işlərimi işıqlandırıb. Deyir türmədə mənə şərait yaradıblar. Bu hansı şəraitdir? Mən iki ildir, ana-atamı görmürəm".

Daha sonra Rasim Məmmədov dövlət ittihamçısının suallarını da cavablandırıb.

Dövlət ittihamçısı ilk olaraq Rasim Məmmədovdan nəyə görə aldığı şirkətləri özü rəsmiləşdirmədiyini soruşub.

O deyib ki, hər yerdə belədir, bu cür rahat olur.

Rasim Məmmədov 13 milyon manat mənimsəmə ilə bağlı epizodu da qəbul etmədyini deyib: 

"Mən kassadan pul götürməmişəm. Ümumiyyətlə "Baku Steel Company" şirkətinin kassası olmayıb. Deyirlər ki, xəyanət etmisən. Kimə xəyanət etmişəm?".

Rasim Məmmədov bildirib ki, 2008-ci ilin noyabr-dekabr aylarından “Baku Steel Company” MMC fəaliyyətə başlayıb:

“Ayda 3-4 milyon gəlir onlar üçün maraqlı deyildi. Onda dedilər ki, “Balaxanı Oil” yatağına marağım var. Dedilər ki, onu almağa kömək eləyim, “Baku Steel”dəki paylarını satacaqlar mənə. Qalan payı almaq məsələsilə əlaqədar İsrailin Baş naziri ilə gedib görüşmüşdüm”.

Rasim Məmmədovun sözlərinə görə, “Balaxanı Oil” məsələsilə əlaqədar o zaman Dövlət Neft Şirkətinin prezidenti (hazırda İqtisadiyyat nazirinin müavini-red.) olan Rövnəq Abdullayevlə görüşüblər, detalları razılaşdırıblar.

İşadamı iddia edir ki, öncə 300 milyona razılaşdırılıb, sonra məbləğ 350 milyona, daha sonra 400, ardınca da 450 milyona qalxıb. 

Məbləğin dəyişməsi, razılaşmanın baş tutmaması müəyyən narahatlıq yaradıb.

Rasim Məmmədov iddia edir ki, “Baku Steel Company”in dirçəlməsi üçün 100 milyondan artıq pul xərcləyib, ondan sonra işlətməyə başlayıb.

Rasim Məmmədov prezident administrasiyasının Sabiq rəhbəri Ramiz  Mehdiyevlə olan münasibətindın danışıb: 

"Ramiz Mehdiyevi atam qədər istəmişəm. Pis günündə də yanında olmuşam. Xəstəxanada yatanda yanında qalmışam. Bəylər Əyyubova da atam kimi yanaşmışam”.

Növbəti proses sentyabrın 16-da davam edəcək.

Qeyd edək ki, “Baku Steel Company” MMC-nin Müşahidə şurasının sədri Məmmədov Rasim Hikmət oğlunun tutduğu vəzifədən irəli gələn səlahiyyətlərdən sui-istifadə edərək, ölkə ərazisində metallurgiya sənayesinin inkişafına, fiziki və hüquqi şəxslərin hüquqlarına, dövlətin qanunla qorunan mənafelərinə mühüm zərər vuran qanunsuz əməllərə yol verməsi ilə bağlı faktlara dair daxil olmuş məlumatlar Dövlət Təhlükəsiziyi Xidməti tərəfindən araşdırılıb.

Rasim Məmmədovun müvafiq vəzifədə işlədiyi dövrdə öz səlahiyyətlərindən qulluq mənafelərinə qəsdən zidd olaraq istifadə edib. 

Rəsmiləşdirilmiş satış üzrə müəssisəyə mədaxil edilmiş pul vəsaitlərindən 13 milyon 200 min manatı mənimsəmə yolu ilə talamasına, 42 milyon manat dəyərində istehsal olunmuş məhsulu israf etməsinə əsaslı şübhələr müəyyən olunub.

Eyni zamanda, onun bu əməlləri ilə “Baku Steel Company” MMC-nin maliyyə ehtiyatlarına və davamlı fəaliyyətinə mühüm ziyan vurmasına, həmçinin müxtəlif şəxslərdən külli miqdarda pul vəsaitini aldatma və etibardan sui-istifadə etməklə ələ keçirib təkrar dələduzluq əməlləri törətməsinə də əsaslı şübhələr müəyyən edilib.

İstintaq orqanı tərəfindən Rasim Məmmədovun barəsində Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 179.4-cü (xüsusilə külli miqdarda ziyan vurmaqla mənimsəmə və israf etmə), 178.3.2-ci (külli miqdarda ziyan vurmaqla dələduzluq) maddələri ilə ittiham elan edilib.

Cinayət işi üzrə zərərçəkmiş qismində “Baku Steel Company” MMC tanınıb.

Fariz Məlikli
Demokrat.az

DİGƏR XƏBƏRLƏR

XƏBƏR LENTİ
Top