Türkiyə A Milli Qadın Voleybol Komandasının Avropa çempionatında ardıcıl ikinci dəfə zirvəyə yüksəldiyi 2026-cı il həm klublar, həm də milli komanda səviyyəsində əldə edilən uğurlarla Türkiyə qadın voleybolunun ili olub.
Demokrat.az xəbər verir ki, ilk dəfə 2023-cü ildə Belçikada keçirilən turnirin finalında Serbiyanı 3:2 hesabı ilə məğlub edərək Avropa çempionu olan milli komanda üç il sonra bu dəfə İstanbulda kuboka sahib çıxıb.
Türkiyə turnirin tarixində 2 qızıl, 2 gümüş və 3 bürünc medalla Avropa çempionatındakı ümumi medal sayını 7-yə çatdırıb. Bundan əlavə, A Milli Qadın Voleybol Komandası Avropa çempionatlarında ardıcıl 5-ci dəfə medal qazanıb.
Türkiyə qadın voleybolu 2026-cı ildə həm klub, həm də milli komanda səviyyəsində mühüm turnirlərdə əldə etdiyi nəticələrlə diqqət çəkib.
Çempionlar Liqasının finalında iki Türkiyə komandası qarşılaşıb. A Milli Qadın Voleybol Komandası isə Millətlər Liqası, Aralıq dənizi Oyunları və Avropa çempionatında çempionluğa yüksəlib.
Türkiyə Avropa qitəsindən Los-Anceles-2028 Olimpiya Oyunlarına vəsiqə qazanıb. Bundan əlavə, klublararası dünya çempionatında da iki Türkiyə komandası – “VakıfBank” və “Eczacıbaşı” dekabrın 8-13-də mübarizə aparacaq.
Türkiyənin Avropa çempionatındakı qələbəsi ilə turnirdə 15 illik seriyaya da son qoyulub. Serbiya 2011-ci ildə keçirilən çempionatda ev sahibi kimi qızıl medal qazanmışdı. 2013-cü ildə Almaniya, 2015-ci ildə Niderland, 2017-ci ildə Azərbaycan, 2019-cu ildə Türkiyə, 2021-ci ildə Serbiya və 2023-cü ildə İtaliyanın ev sahibliyi etdiyi çempionatlarda meydan sahibi ölkələr kuboka sahib ola bilməmişdi.
Türkiyə 15 ildən sonra ev sahibi kimi qızıl medal qazanan ilk komanda olub.
Milli voleybolçu Melissa Varqas 2026-cı il Avropa çempionatının ən dəyərli oyunçusu (MVP) seçilib. 2023-cü il Avropa çempionatında da eyni mükafata layiq görülən Varqas bununla da turnirdə ardıcıl ikinci dəfə MVP adını qazanıb.
Varqasın Avropa çempionatı ilə yanaşı, Millətlər Liqası, Türkiyə Liqası, Türkiyə Kuboku və Türkiyə Super Kubokunda qazandığı mükafatlarla karyerasındakı MVP sayısı 10-a yüksəlib.
Jalə Demokrat.az
