“Barselona” uzun illərdir yüksək borcları və maliyyə problemləri ilə gündəmdədir. Klubun borcu 1,5 milyard avronu ötməkdə davam etsə də, Xuan Laporta rəhbərliyi tətbiq etdiyi maliyyə layihələri, akademiyadan yetişən futbolçuların satışı və gəlirlərin bərpası hesabına klubu yenidən rəqabətədavamlı vəziyyətə gətirib.
Demokrat.az goal.com-a istinadən xəbər verir ki, Josep Maria Bartomeunun prezidentliyi dövründə “Barselona” 29 futbolçuya 1 milyard avrodan çox vəsait xərcləyib. Osman Dembele, Filip Koutinyo və Antuan Qrizmann kimi yüksək məbləğlərə transfer olunan futbolçuların gözlənilən nəticəni verməməsi klubun maliyyə vəziyyətini daha da ağırlaşdırmışdı.
Pandemiya isə problemi dərinləşdirdi. Stadionun, muzeyin, mağazaların və digər gəlir mənbələrinin bağlanması klubun pul axınında ciddi problemlər yaratdı.
2021-ci ildə prezident seçilən Xuan Laporta ilk böyük qərarlarından birini Lionel Messi ilə bağlı verməli oldu. Klub argentinalı ulduzun müqaviləsini yeniləyə bilmədi və Messi “Barselona”dan ayrıldı.
Laportanın qarşısında iki seçim var idi: heyəti zəiflədərək xərcləri azaltmaq və bir neçə il gözləmək, yaxud gələcək gəlirlərin bir hissəsindən indidən istifadə edərək komandanı gücləndirmək. O, ikinci yolu seçdi.
2022-ci ildə “Barselona” La Liqadakı yayım hüquqlarının 25 illik dövr üçün 25 faizini Sixt Strit investisiya şirkətinə sataraq 582 milyon avro əldə etdi. Bu və digər maliyyə layihə hesabına klub Robert Levandovski, Rafinya və Jules Kounde kimi futbolçuları transfer edə bildi.
Bu strategiya qısa müddətdə nəticə verdi. “Barselona” həmin mövsüm dördillik fasilədən sonra La Liqa çempionu oldu.
Son illərdə klubun məşhur akademiyası La Masia-nın rolu daha da artıb. Lamin Yamal və Pau Kubarsinin əsas komandaya yüksəlməsi “Barselona”ya bahalı transferlərə olan ehtiyacı azaltmağa imkan verib.
Bundan başqa, klub akademiyadan yetişən və əsas komandada özünə yer tapa bilməyən futbolçuları sataraq əhəmiyyətli gəlir əldə edir. Bəzi gənc oyunçuların 5–10 milyon avroya satılması belə klubun maliyyə öhdəliklərini qarşılamağa kömək edir.
Bu satışların əsas üstünlüyü isə həmin futbolçuların yetişdirilməsi üçün çəkilən xərclərin artıq əvvəlcədən ödənilmiş olmasıdır. Buna görə transfer gəlirlərinin böyük hissəsi “Barselona” üçün xalis qazanca çevrilə bilir.
“Barselona” bu yay Antoni Qordon, Karim Adeyemi və Rodri üçün ümumilikdə 150 milyon avrodan çox vəsait xərcləyib. Buna baxmayaraq, klub futbolçuların La Liqada qeydiyyatdan keçirilməsi üçün lazım olan maliyyə imkanını son anda təmin edə bilib.
Joao Kanselonun qeydiyyatı isə mövsümün başlamasına cəmi bir gün qalmış tamamlanıb.
Klubun hücum xəttində yaranan boşluğu Julian Alvarezlə doldurmaq ehtimalı da müzakirə olunur. Bunun üçün isə “Barselona”nın daha bir futbolçunu sataraq transferin maliyyə yükünü kompensasiya etməsi lazım gələ bilər.
Ekspertlərin fikrincə, “Barselona”nın maliyyə vəziyyətində dönüş artıq başlayıb. Yeni "Camp Nou"nun istifadəyə verilməsi, stadion gəlirlərinin artması, turizmin bərpası və La Masia-dan futbolçu satışlarının davam etməsi klubun gəlirlərini yüksəldə bilər.
Bununla belə, “Barselona” hələ də gələcək yayım gəlirlərinin bir hissəsini Sixt Streetə ödəyir. Bu öhdəlik klubun maliyyə manevr imkanlarını müəyyən qədər məhdudlaşdırır.
Buna baxmayaraq, ekspertlər hesab edirlər ki, “Barselona” artıq əvvəlki kimi yeni maliyyə layihələrinə müraciət etməyə məcbur deyil. Klubun ən ağır maliyyə problemlərinin sona çatmasının başlanğıcı müşahidə olunur.
Jalə Demokrat.az
