Arıqlamaq üçün geniş istifadə olunan semaqlutid preparatı qadınlarda reproduktiv sağlamlığı yaxşılaşdıra bilər. Bu nəticəyə ABŞ-nin Kolorado Universitetinin alimləri gəliblər.
Demokrat.az xəbər verir ki, araşdırmanın ilkin nəticələri elmi nəşr olan "Fertility and Sterility" jurnalında dərc edilib.
Tədqiqat əsasən polikistik yumurtalıq sindromundan əziyyət çəkən qadınları əhatə edib. Alimlər preparatın bu xəstələrdə reproduktiv göstəricilərə təsirini araşdırıblar.
Polikistik yumurtalıq sindromu reproduktiv yaşdakı qadınlar arasında geniş yayılıb. Xəstəlik hormonal pozuntularla xarakterizə olunur.
Bu sindrom menstruasiya dövrünün pozulmasına səbəb ola bilər. Həmçinin kişi hormonlarının səviyyəsi yüksələ bilər.
Xəstəlik ovulyasiya problemləri yaradır və sonsuzluq riskini artırır. Bir çox xəstədə artıq çəki və maddələr mübadiləsi pozuntuları da müşahidə olunur.
Alimlər klinik sınaqda iştirak edən 12-35 yaş arası şəxslərin məlumatlarını təhlil ediblər. Araşdırma RESTORE adlı proqram çərçivəsində aparılıb.
Tədqiqat zamanı ən azı 10 faiz çəki itirən qadınlara xüsusi diqqət yetirilib. Bu iştirakçılar semaqlutid qəbul edirdilər.
Nəticələr alimlərin gözlədiyindən daha tez ortaya çıxıb. Bu səbəbdən tədqiqat qrupu aralıq nəticələri ictimaiyyətə təqdim edib.
Araşdırma göstərib ki, preparat bəzi reproduktiv göstəricilərin yaxşılaşmasına kömək edə bilər. Xüsusilə ovulyasiya ilə bağlı müsbət dəyişikliklər qeydə alınıb.
Müəlliflər bildirirlər ki, semaqlutid iki mühüm problemin həllinə eyni vaxtda təsir göstərə bilər. Bunlardan biri artıq çəki, digəri isə ovulyasiya pozuntularıdır.
Bununla belə, alimlər ehtiyatlı olmağa çağırırlar. Onların sözlərinə görə, hazırkı nəticələr yekun hesab edilmir.
Araşdırma hələ də davam edir. Preparatın reproduktiv sağlamlığa təsiri ilə bağlı daha dəqiq nəticələr sonrakı mərhələlərdə məlum olacaq.
Aytən Demokrat.az
