Adi interyerlərdə qonaq otağında laminat, vanna otağında isə kafel istifadəsi artıq klassik seçim sayılır. Lakin son illərdə bu yanaşma dəyişir və onun yerini getdikcə daha çox poluretan əsaslı monolit döşəmə örtükləri tutur.
Demokrat.az xəbər verir ki, bu barədə “Dobrzemieszkaj” nəşrinə istinadən məlumat verilib.
Mütəxəssislərin fikrincə, bu trend xüsusilə 2026-cı ildə daha da geniş yayılacaq. Poluretan qatranından hazırlanan döşəmələr bütün mənzili vahid səth kimi birləşdirir və otaqlar arasında vizual sərhədləri aradan qaldırır. Nəticədə interyer sanki tikişsiz, bütöv bir səth kimi görünür və hətta balkonlara qədər uzana bilir.
Bu növ örtük xüsusi qarışığın əvvəlcədən hazırlanmış, adətən beton əsas üzərinə tökülməsi ilə yaradılır. Sərtləşdikdən sonra tam hamar və tikişsiz səth əmələ gəlir.
Son illərdə bu tip döşəmələrə marağın artmasının əsas səbəblərindən biri də ənənəvi kafel aralarındakı tikişlərin yaratdığı problemlərdir. Zamanla tündləşən və çirklənən bu hissələrin təmizlənməsi çətin olur. Poluretan döşəmələr isə bu problemi aradan qaldırır, çünki səthdə boşluq və tikiş olmur, toz və kir yığılmır.
Belə örtüklər həm də məkanı vizual olaraq daha geniş göstərir. Xüsusilə kiçik mənzillərdə bu effekt daha çox nəzərə çarpır və interyer daha açıq və ahəngdar görünür.
Bundan əlavə, poluretan döşəmələr yüksək davamlılığı ilə seçilir. Onlar həm yaşayış evlərində, həm də ofis və ictimai məkanlarda geniş istifadə olunur. Material elastik olmaqla yanaşı, eyni zamanda möhkəmdir və intensiv istifadəyə davam gətirir.
Bu örtük istilik döşəmə sistemləri ilə də uyğundur və istiliyi yaxşı ötürür. Eyni zamanda, minimalizm, loft və müasir sənaye interyeri üslublarında geniş tətbiq edilir və dizaynerlər tərəfindən getdikcə daha çox seçilir.
Jalə Demokrat.az
