Vaxtaşırı desert yemək sağlamlığa ciddi zərər verməyə bilər, hətta müəyyən hallarda gündəlik az miqdarda şirniyyatın istifadəsi psixoloji və qida davranışı baxımından bəzi müsbət təsirlər də yarada bilər. Lakin mütəxəssislər şəkər və doymuş yağ tərkibli məhsulların həddindən artıq istifadəsinin risklərini də vurğulayırlar.
Demokrat.az xəbər verir ki, diyetoloq Roxana Ehşani hər gün desert yeməyin orqanizmdə yarada biləcəyi əsas dəyişiklikləri açıqlayıb:
1. Ürək xəstəlikləri riskini artıra bilər
Araşdırmalara görə, əlavə şəkərin yüksək miqdarda qəbulu ürək-damar xəstəliklərinin inkişaf riski ilə əlaqələndirilir. Şəkər əsasən desertlər və şirin içkilər vasitəsilə orqanizmə daxil olur. Mütəxəssislər gündəlik kalori qəbulunun 10 faizindən çoxunun əlavə şəkərdən ibarət olmamasını tövsiyə edirlər.
2. Qida ilə daha sağlam münasibət formalaşdıra bilər
Kiçik miqdarda və müntəzəm şəkildə desert yemək qida ilə bağlı qadağa hissini azalda bilər. Bu isə bəzi insanlarda günahkarlıq hissinin qarşısını alaraq daha balanslı qidalanma davranışı formalaşdıra bilər.
3. Qaraciyərə mənfi təsir göstərə bilər
Bəzi desertlər yüksək miqdarda doymuş yağ ehtiva edir ki, bu da uzunmüddətli dövrdə qaraciyər yağlanması kimi problemlərlə əlaqələndirilir. Mütəxəssislər doymuş yağların gündəlik kalori qəbulunun məhdud hissəsini təşkil etməsini tövsiyə edirlər.
4. Bəzi faydalı qida maddələrinin qəbulunu artıra bilər
Meyvə, qoz-fındıq, tünd şokolad və süd məhsulları ilə hazırlanan desertlər orqanizmə kalsium, antioksidantlar və faydalı yağlar verə bilər. Xüsusilə qatıq və süd əsaslı desertlər müəyyən qida dəyəri ilə seçilir.
Mütəxəssislər həmçinin desertlərin daha sağlam hazırlanması üçün şəkərin azaldılması, meyvə və qoz-fındıq kimi təbii əlavələrdən istifadə edilməsi və daha faydalı un növlərinin seçilməsini tövsiyə edirlər. Bununla yanaşı, qidalanmada ciddi dəyişiklik etməzdən əvvəl həkimlə məsləhətləşmək vacib sayılır.
Jalə Demokrat.az
