Noxud, noxudun başqa növləri, lobya və mərcimək kimi paxlalılar çox vaxt qida dəyəri baxımından oxşar məhsullar sayılır. Lakin onların dadı, teksturası və tərkibi arasında müəyyən fərqlər var.
Demokrat.az xəbər verir ki, bu fərqlər və hansı məhsulun daha üstün olduğu barədə “Prevention” nəşrinin ekspertləri məlumat verib.
Lobya və mərcimək – faydası və xüsusiyyətləri
Lobya ölçü baxımından daha böyükdür, bişirilməsi daha uzun çəkir və müxtəlif növləri var: qara, qırmızı, ağ, pinto və s. Mərcimək isə daha kiçikdir, daha tez bişir və əsasən qırmızı, yaşıl və ya qəhvəyi rənglərdə olur. Hər iki məhsul isə zülal, lif və kompleks karbohidratların qiymətli mənbəyi hesab olunur.
Lobyanın faydası və xüsusiyyətləri
ABŞ Quru Lobya Şurasının məlumatına görə, 100 qram bişmiş lobya təxminən 117–119 kalori, 7 qrama qədər zülal və təxminən 7 qram lif ehtiva edir.
Mütəxəssislərə görə, lobyanın əsas üstünlüyü onun qida zənginliyi və müxtəlifliyidir. O, zülal, dəmir, fol turşusu və antioksidantlarla zəngindir. Tərkibindəki lif isə uzunmüddətli toxluq hissi yaradır və həzm sistemini dəstəkləyir.
“Nutrition” jurnalında dərc edilən araşdırmalara əsasən, lobyanın müntəzəm istifadəsi qidalanmanın keyfiyyətini yaxşılaşdıra, ürək sağlamlığını dəstəkləyə və qanda şəkərin tənzimlənməsinə kömək edə bilər.
Mərciməyin faydası və xüsusiyyətləri
Mərcimək zülal və lif tərkibinə görə bir qədər üstün hesab olunur: eyni porsiyada təxminən 9 qram zülal və 8 qram lif, 114 kalori ilə.
Oxşar xüsusiyyətlərə malik olsa da, mütəxəssislər mərciməkdə dəmir və fol turşusunun daha yüksək olduğunu qeyd edirlər. Bu maddələr maddələr mübadiləsi və hüceyrələrin yenilənməsi üçün vacibdir.
Bundan əlavə, “Nutrients” jurnalına əsasən, mərciməyin aşağı glikemik indeksi var, bu da qanda şəkərin kəskin yüksəlməsinin qarşısını alır və daha sabit enerji təmin edir.
Eyni miqdarda hansı daha faydalıdır: lobya, yoxsa mərcimək?
Mütəxəssislərin fikrincə, hər iki məhsul çox faydalıdır və bir-birini əvəz edə bilər. Mərcimək daha yüngül həzm olunduğu və tez bişdiyi üçün həssas mədəsi olan və həzm yükünü azaltmaq istəyən insanlar üçün daha uyğundur.
Lobya isə maqnezium və kalium kimi bəzi minerallarla daha zəngindir, bu da ürək-damar sistemi və enerji üçün faydalıdır.
Nəticə olaraq, hansı məhsulun daha yaxşı olduğu barədə dəqiq üstünlük yoxdur. Seçim insanın ehtiyacından və qidalanma vərdişindən asılıdır: yüngül həzm üçün mərcimək, daha qidalandırıcı seçim üçün isə lobya daha uyğun ola bilər.
Əks göstərişlər
Hər iki məhsul bağırsaq bakteriyaları tərəfindən parçalanan xüsusi karbohidratlara görə köp və qaz yarada bilər. Bu narahatlığı azaltmaq üçün paxlalıların isladılması, yaxşı bişirilməsi və rasiona tədricən əlavə edilməsi tövsiyə olunur.
Həmçinin onların tərkibində purinlər (sidik turşusunun artmasına səbəb ola bilər) və fitatlar (bəzi mineralların mənimsənilməsini azalda bilər) var. Buna görə podaqra, böyrək xəstəlikləri və ya mikroelement çatışmazlığı olan şəxslər üçün məhdudiyyət tövsiyə olunur.
Ümumilikdə dietoloqlar hesab edir ki, lobya və mərcimək qida dəyəri baxımından çox oxşardır və “ən yaxşı” seçim deyil, gündəlik rasiona daha rahat daxil edilə bilən məhsul seçilməlidir.
Jalə Demorat.az
