“Son günlər doğma teatrımda baş verən söz-söhbətlərə susmağım laqeyd münasibətimdən irəli gəlmir. Əziz həmkarlarımın müsahibələrinə yazılan şərhlərdə adımın hallanması, “Şəhid atası təhqir olunmuş Məsmə niyə susur?” kimi yazılar, təbii ki, mənə xoş təsir bağışlamır. Bəli, acı da olsa, bu, bir həqiqətdir: Mehriban Xanlarovanın mənim haqqımda paylaşdığı məlumat doğrudur. (“Aaz, 20 Yanvar var? Qurtardı 20 Yanvar söhbəti! 20 Yanvar şəhidləri dəbdə deyil!” — Müəllif: Mehriban Ələkbərzadə)”.
Bu sözləri Əməkdar artist Məsmə Aslanqızı bildirib.
Aktrisa bir ildir Mehriban Ələkbərzadənin ona etdiklərinə dözdüyünü, lakin artıq tab gətirə bilmədiyini qeyd edib:
“Akademik Milli Dram Teatrında çalışdığım 30 il ərzində heç vaxt heç bir rəhbərliklə ədavətim olmayıb. Qalmaqaldan, söz-söhbətdən hər zaman uzaq durmuşam. İşimə məsuliyyətlə, sevgi və sədaqətlə yanaşmışam. Eyni səhnəni Səyavuş Aslan, Yaşar Nuri, Eldəniz Zeynalov, İlham Əsgərov, Telman Adıgözəlov, Elxan Ağahüseyn oğlu, Safura İbrahimova, Arif Quliyev, Ramiz Novruzov, Ramiz Məlikov, Fuad Poladov, Kamal Xudaverdiyev, Əjdər Həmidov və digər tanınmış sənətkarlarla bölüşmüşəm. Bu illər ərzində həmkarlarım və tamaşaçılarımın hörmətini qazanmışam. Heç vaxt heç kəsin dilindən öz ünvanıma “aaz” deyə bir ifadə eşitməmişəm.
Azərbaycanın milli dəyərlərinə, şəhidlərə və onların ailələrinə bu cür münasibəti qəbul edən bir rəhbərlə eyni teatrda işləmək mənim üçün bir dərd və kədərdir. Bu mənim nəinki şəxsi problemimdir, bu mənim borcumdur! Susmaq cinayətdir! Mən bir şəhid övladı olaraq bu sükutu pozuram. Atamın timsalında 20 Yanvar şəhidlərinə edilən bu hörmətsizlik təkcə mənim deyil, bir millətin heysiyyətinə toxunur!
Ümid edirəm ki, 20 Yanvar şəhidlərinə və onların ailələrinə qarşı hörmətsizlik edən Mehriban Ələkbərzadə vəzifəsindən azad ediləcək. Onun vəzifə başında qalması şəhid ailələrinə təhqirdir.
Vəzifə kürsüsündə əyləşən şəxs ilk növbədə xalqına, onun dəyərlərinə və şəhidlərinə sədaqət nümayiş etdirməlidir. Əgər bir insan bu əziz və toxunulmaz dəyərlərə laqeyd yanaşır, hətta onları alçaldırsa, həmin şəxs nə mənəvi, nə də hüquqi baxımdan ictimai vəzifə daşımağa layiqdir.
Mən bu məsələdə ədalətin bərpa olunacağına, dövlətimizin şəhidlərə və onların ailələrinə hər zaman göstərdiyi diqqət və ehtiramın bu dəfə də özünü göstərəcəyinə qəti şəkildə inanıram.
Unutmamalıyıq ki, şəhidin adına toxunmaq bütöv bir xalqın yaddaşına toxunmaq deməkdir. Bu isə bağışlanmazdır!”
