“Hazırda dünyanı koronavirus təhlükəsinin bürüdüyü bir vaxtda dövlətimiz əhalinin sağlamlığını qorumaq və təhlükəli virusdan xilas etmək üçün bütün vasitələrdən istifadə edir. Koronavirus pandemiyasının ilk günlərindən Prezident İlham Əliyev tərəfindən vaxtında qəbul edilən qərarlar ölkəmizdə sanitar-epidemioloji vəziyyəti stabilləşdirdi”.
Demokrat.az xəbər verir ki, bu fikirləri millət vəkili Cavanşir Paşazadə deyib.
Deputat qeyd edib ki, koronavirus pandemiyası ilə bağlı Azərbaycan dövləti ilk gündən vətəndaşının yanında oldu: “Ölkə Prezidenti tərəfindən həyata keçirilən düşünülmüş siyasət nəticəsində qabaqlayıcı, sistemli tədbirlər Azərbaycanda vəziyyəti nəzarət altında saxlamağı bacardı. Hələ Azərbaycanda pandemiya yayılmamışdan öncə zamanında ölkəmizə tibbi ləvazimatlar gətirildi. Həqiqətən də, ölkəmizdə bu istiqamətdə görülən işlər dünya ölkələri üçün nümunədir”.
Deputatın sözlərinə görə, hazırda bəzi məhdudiyyətlərin aradan qaldırılması, vətəndaşların Operativ Qərargah tərəfindən müəyyən olunmuş qaydalara, sosial izolyasiya tədbirlərinə əməl etməməsi sayəsində koronavirus infeksiyasına yoluxma hallarının sayında artım müşahidə edildi: “Koronavirus pandemiyasına qarşı mübarizədə gigiyena qaydalarına düzgün əməl olunması, sosial məsafəni gözləmək, tənəffüs yollarını qoruyan tibbi maskalardan istifadə ən vacib tələblərdən idi. Hazırda yay dövrüdür və insanlarımızın bir-biri ilə mütəmadi ünsiyyətdə olması, çimərliklərə getməsi, şəhər və rayonlara insanların axını, rayon yerlərində virusa inamsızlıq və s. məsələlər virusun daha da çoxalmasına səbəb oldu. Təbii ki, qaydalara riayət edilməməsi, karantin rejiminin yenidən sərtləşdirilməsinə, müvafiq məhdudiyyətlərin yenidən tətbiq olunmasına gətirib çıxardı”.
C.Paşazadə deyib ki, iyunun 21-dən iyulun 5-dək tətbiq olunacaq sərt karantin rejimi məcburiyyətdən yaranmış bir haldır: “Azərbaycan dövləti də istəyir ki, bu pandemiya tez bir zamanda aradan qalxsın və həyat əvvəlki kimi öz yoluna dönsün. COVID-19 pandemiyası şəraitində ölkə əhalisinin birlik və həmrəylik göstərməsi vacib şərtdir. Ona görə də qarşıdakı müddətdə virusun geniş yayılmaması, insanlar arasında daha təhlükəli fəsadlar yaratmaması üçün hər bir vətəndaşın karantin rejiminin qaydalarına ciddi şəkildə əməl etməsi olduqca vacibdir”.(sherg.az)
