Azərbaycan Prezidenti İlham Əliyev Bakı Dövlət Universitetinin 100 illik yubileyi münasibətilə keçirilən mərasimdə 1992-93-cü illərdəki hakimiyyətlə bağlı dolğun məlumat verdi. Xüsusilə gənc nəsil Azərbaycanın keçdiyi tarixi yolu, hansı çətinliklərin, mürəkkəb proseslərin baş verdiyini bilməlidir”.
Demokrat.az bildirir ki, bunu Pravda.az-a açıqlamasında Milli Məclisin deputatı Nəsib Məhəməliyev deyib.
Deputat qeyd edib ki, AXC - Müsavat cütlüyünün hakimiyyəti dövründə dövlətlərarası münasibətlər dağılmışdı: “Ətraf ölkələrlə münasibətlər ciddi şəkildə pozulmuşdu, ikitərəfli və çoxtərəfli əlaqələr zədələnmişdi. Türkdilli ölkələrlə də münasibətlərdə ciddi gərginlikər yaranmışdı. Təsəvvür edin, Özbəkistanın Prezidenti o dövrdə Azərbaycanın Baş Naziri vəzifəsini icra edən şəxsi qəbul etməmişdi. Çünki hakimiyyət Özbəkistanın daxili işlərinə qarışmaqda ittiham edilirdi. Digər türkdilli dövlətlərin rəhbərlərinə hansı dildə danışmaqları, "demokratik" dəyərlərin cəmiyyətə aşılanması ilə bağlı göstərişlər verməkdə özlərində cürət tapırdılar. Rusiya ilə münasibətlər kəskin şəkildə pozulmuşdu. Baxmayaraq ki, Rusiya qonşumuzdur, xeyli sayda soydaşımız orada yaşayır. İranla da münasibətlər gərgin idi, sərhəddə tez-tez təxribatlar baş verirdi. ABŞ-la münasibət normal deyildi. İndi bir çoxları inkar edir, Amerikanın dəstəyindən danışırlar. Faktdır ki, 907-ci düzəliş ilə (907-ci düzəliş — 1992-ci ildə erməni lobbisinin təşəbbüsü ilə ABŞ Konqresi tərəfindən "Azadlığa Dəstək" Aktına qəbul edilən və Azərbaycana Amerikanın birbaşa dövlət yardımını yasaqlayan düzəlişdir – red) Azərbaycana tətbiq edilən sanksiya AXC-Müsavat cütlüyünün hakimiyyəti dövründə qəbul tətbiq edildi. Təsəvvür edin, həm torpaqlarımız işğal edilir, həm də sanksiya tətbiq olunur, guya Ermənistanı blokadaya almışıq. Dövlət idarəetmə sistemindəki nöqsanlar xarici, daxili siyasətə, iqtisadiyyata, bir sözlə bütün sahələrə təsir etmişdi. O dövrdə ali təhsili olmayanlara da yüksək vəzifə verirdilər. Bu da əhali arasında narazılığa səbəb olurdu”.
N.Məhəməliyev vurğulayıb ki, ölkədə müharibə getdiyi halda onlar da büdcəni "süpürmüşdülər": “Onların ölkədə atdığı addımlar rezonans doğururdu, şok effekti yaradırdı. İnsanlarda hakimiyyətə tam inamsızlıq formalaşmışdı. Bütün bunlar vətəndaş müharibəsinə gətirib çıxardı, Gəncə hadisələri baş verdi. Cəmiyyətdə ağsaqqala, ziyalıya deyil, kriminal ünsürlərə inam var idi, onları qəbul edirdilər. İş adamları kriminal aləmin nümayəndələrinə haqq verirdilər. Ölkədə kütləvi qətllər baş verirdi. Nəinki gecə, heç gündüz də çölə çıxmaq mümkün deyildi. Hər tərəfdə kriminal aləmin nümayəndələri "razborka" aparırdılar. Dəhşətli proseslər baş verirdi. Allah eləməsin, Azərbaycan bir daha belə halla rastlaşsın”.
Parlamentin üzvü deyib ki, həmin dövrlə bağlı diskussiyalar konkret faktlara əsaslanmalıdır: “İnsanları, xüsusilə də gənc nəsli yağlı vədlərlə, populist çıxışlarla aldada bilərlər. Bunun baş verməməsi üçün əməli işlər görülməli, təbliğat işi gücləndirilməlidir. İnanıram ki, Prezident İlham Əliyevin rəhbərliyi ölkədə yaradılan sabitlik, inkişaf tempi daha da yüksələcək, insanlar xoşbəxt gələcəklərini qura biləcəklər”.
