Milli Məclisin sabiq deputatı Sultan Məmmədov sentyabrın 14-də doğulduğu Astara rayonunda uzun sürən xəstəlikdən dünyasını dəyişib.
Demokrat.az xəbər verir ki, bu barədə yaxınları məlumat yayıb.
Mərhum sabah Astara rayonunda dəfn ediləcək.
Sultan İsrafil oğlu Məmmədov 10 mart 1938-ci ildə Astara rayonunda anadan olub.
1965-ci ildə Bakı Dövlət Universitetini, 1978-ci ildə Bakı Ali Partiya Məktəbini bitirib. 1971-73-cü illərdə Astara şəhər Zəhmətkeş Deputatları Soveti İcraiyyə Komitəsinin sədri, 1973-77-ci illərdə Astara rayon partiya komitəsinin katibi, 1977-1980-ci illərdə Astara rayon Xalq Deputatları Soveti İcraiyyə Komitəsinin sədri, 1980-1988-ci illərdə Lerik rayon partiya komitəsinin birinci katibi, 1988-1991-ci illərdə Astara rayon partiya komitəsinin birinci katibi, 1992-1995-ci illərdə isə Azərbaycan Respublikası Mənzil-komunnal Təsrrüfatı nazirinin birinci müavini vəzifələrində çalışıb.
Üç çağırış Azərbaycan SSR Ali Sovetinin, Azərbaycan Respublikası Milli Məclisinin üzvü, Mənzil-kommunal daimi komisiyasının sədri olub.
1995-2000-ci illərdə Azərbaycan Respublikası Milli Məclisinin deputatı, Azərbaycan-İran dostluq qrupunun rəhbəri kimi fəaliyyət göstərib.
O, "Şərəf nişanı", "Xalqlar dostluğu" ordenləri, bir sıra medallar və fəxri fərmanlarla təltif edilib.
2019-cu ildə Prezident İlham Əliyevin sərəncamı ilə "Azərbaycan Xalq Cumhuriyyətinin 100 illiyi (1918-2018)” yubiley medalı təqdim olunub.