"Qalatasaray"ın nigeriyalı ulduzu Viktor Osimhen dünya nəhənglərinin diqqətini cəlb etməkdə davam edir. İstanbul təmsilçisinin satmağa qətiyyən meyilli olmadığı futbolçu üçün rekord məbləğdə təklif gəlib. Klub prezidenti Dursun Özbek isə təklifə dərhal cavab verib.
Demokrat.az Türkiyə mediasına istinadən xəbər verir ki, "Qalatasaray" forması ilə yeni mövsümə möhtəşəm başlayan Viktor Osimhen yüksək səviyyəli çıxışı ilə Avropanın aparıcı klublarının marağını artırmaqda davam edir. Adı tez-tez İngiltərə klubları ilə hallanan nigeriyalı hücumçu üçün daha bir klub "Qalatasaray"ın qapısını döyüb.
"Skorer"in məlumatına görə, mövsümə əla start verərək iki oyunda 4 qol və 1 məhsuldar ötürmə ilə yadda qalan Viktor Osimhen üçün "Əl Hilal" 130 milyon avro məbləğində təklif göndərib.
Avropanın bir çox klubunun da yaxından izlədiyi futbolçu ilə bağlı təklif hələ də masada olsa da, "Qalatasaray" prezidenti Dursun Özbek qərarını verib.
Məlumata görə, Dursun Özbek Osimhen üçün edilən 130 milyon avroluq təklifi dərhal rədd edib. Klub rəhbərliyinin nigeriyalı hücumçunun mövsümə uğurlu startından sonra gələn ilin əvvəlində onun üçün 150-200 milyon avro həcmində təkliflər alacağını düşündüyü bildirilir.
"Qalatasaray" həmçinin hesab edir ki, hazırlıq düşərgəsində zədə problemi yaşamayan Osimhenin bu mövsüm komandaya töhfəsi daha da yüksək olacaq. Nigeriya millisinin bu mövsüm Afrika Millətlər Kubokunda iştirak etməyəcək olması da hücumçunun klubdakı oyun sayına müsbət təsir göstərə bilər.
Osimhen Türkiyə Superliqasının ilk iki turunda 4 qol vurub və 1 məhsuldar ötürmə edib.
Jalə Demokrat.az
