Erməni milyarder Qarabağa gələrək dünya ermənilərini birliyə çağırdı

QARABAĞ 01 sen 2022, 21:42
Rusiya vətəndaşlığından imtina edərək Qarabağa köçmək niyyətində olduğunu bildirən rusiyalı milyarder Ruben Vardanyan dünya ermənilərinə Qarabağdakı haylara dəstək üçün müraciət edib.

Moderator.az  xəbər verir ki,  News.am-ın yaydığı məlumata görə, R.Vardanyan video-müraciətini Xocavənd rayonunun işğal altındakı "Sxtoraşen" adlandırılmış Şıx Dursun kəndində yerləşən 2040 yaşı olduğu iddia edilən nəhəng qoca çinarın yanında dayanaraq ünvanlayıb.
 
“İnanıram ki, 2020-ci il müharibəsindən sonra biz bütün dünya erməniləri Artsax xalqı ilə bir yerdə olmalıyıq. Biz onlara nəinki simvolik dəstək verməliyik, həm də əməldə kömək etməliyik. Artsax dünya erməniliyinin mərkəzidir”- deyə rusiyalı erməni milyarder çərənləyib. 
 
O, Rusiyaya Qarabağdakı mövcudluğuna və “sülhməramlı” qoşunları tərəfindən buradakı erməniləri müdafiə etməsinə görə minnətdarlığını bildirib.
 
“Düşünürəm ki, sülhməramlıların mandatı dəqiqləşdirilməli və Artsax xalqının təhlükəsizliyini öz gücümüzlə təmin edə bilənə qədər onların qalma müddətləri artırılmalıdır”- deyə erməni milyarder vurğulayıb.
 
R.Vardanyan soydaşlarına müraciət edərək bildirib ki, bu gün vəziyyət təxminən 100 il əvvəl “ermənilər öz güclərini toplayaraq, silahsız bir şəkildə Sərdarabadda düşmənin qarşısını alan möcüzə göstərdikləri zaman” kimidir(Söhbət 1918-ci ildə İrəvan yaxınlığındakı Sərdarabad dəmiryol stansiyası yaxınlığında Osmanlı qoşunlarının İrəvana girişinin qarşısının alındığı döyüşdən gedir-S.L.). 
 
Xatırladaq ki, 44 günlük savaşdan öncə  və sonra Azərbaycan torpaqlarında məskunlaşmış haylara mütəmadi maliyyə yardımı edən Ruben Vardanyan avqustun əvvəlində, yəni Laçın şəhəri, Zabux və Sus kəndlərinin boşaldılması məsələsi gündəmə gəldikdən sonra Qarabağda "Artsaxın təhlükəsizliyi və inkişafı cəbhəsi" yaratmaq təşəbbüsü ilə çıxış edib.
 

DİGƏR XƏBƏRLƏR

XƏBƏR LENTİ
Top