Qəbələ rayonunda ərəb turistlərin qaldığı evdə baş verən yanğın zamanı xəsarət alanlar Bakıya gətiriləcək.
Bunu Oxu.Az-a açıqlamasında Səhiyyə Nazirliyinin mətbuat xidmətinin mütəxəssisi Səfayə Əhmədova bildirib.
Onun sözlərinə görə, yanğın zamanı xəsarət alanlar Qəbələ Rayon Mərkəzi Xəstəxanasına yerləşdiriliblər:
“Bakıdan oraya həkim briqadası göndərilib. Xəstəxanada olanlar Ə.Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) Plastik və Rekonstruktiv Cərrahiyyə klinikasının nəzdində fəaliyyət göstərən Yanıq Şöbəsinə gətiriləcək”.
11:19
Qəbələ rayonunda ərəb turistlərin qaldığı evdə baş verən yanğın zamanı bir nəfər ölüb, altı nəfər yaralanıb.
Report-un xəbərinə görə, hadisə zamanı evdə olan Küveyt vətəndaşları - 1993-cü il təvəllüdlü Əhmad Adnan Əl-Həmidi, 2001-ci il təvəllüdlü Nura Adnan Əl-Həmidi, 1989-ci il təvəllüdlü Sara Adnan Əl-Həmidi, 2017-ci il təvəllüdlü Adam Mudar Əl-Dehni, 1960-ci il təvəllüdlü Raba Muhammed Əl-Rovaşda, 1958-ci il təvəllüdlü Adnan Əl-Həmidi müxtəlif dərəcəli bədən xəsarətləri və tüstüdən zəhərlənmə diaqnozu ilə Qəbələ Rayon Mərkəzi Xəstəxanasına çatdırılıblar.
Yaralılara ilkin tibbi yardım göstərilib, onlardan üç nəfərinin vəziyyətinin ağır olduğu bildirilir.
Faktla bağlı araşdırmalar davam etdirilir.
10:38
Qəbələ rayonunda ərəb turistlərin yaşadığı evdə yanğın olub.
Demokrat.Az Report-a istinadən xəbər verir ki, hadisə rayon mərkəzində yerləşən fərdi evlərdən birində baş verib.
Belə ki, ərəb turistlərin kirayələyərək yaşadığı evdə baş verən yanğın zamanı bir nəfər ölüb, iki nəfər yaralanıb.
Yanğının söndürülməsi üçün əraziyə Fövqəladə Hallar Nazirliyinin Qəbələ Rayon Yanğından Mühafizə Xidmətinin yanğınsöndürən maşınları və canlı qüvvəsi cəlb edilib. Yanğın lokallaşdırılıb.
Hazırda ölən və yaralananların şəxsiyyəti dəqiqləşdirilir.
Faktla bağlı araşdırma aparılır.
