“Təyin olunmuş deputatlarımız niyə fərdlər uğrunda bir-birini tənqid atəşinə tutublar. Axı biz fərdlər yox, torpaq uğrunda mübarizə aparmalıyıq”.
Demokrat.az xəbər verir ki, bu sözləri Parlamentin dünənki iclasında millət vəkillərinin bir-birinə qarşı tənqidi fikirlər səsləndirməsi ilə bağlı açıqlamasında Müasir Müsavat Partiyasının sədr müavini Könül İsmayılova deyib.
K.İsmayılova bildirib ki, parlamentdə çıxışlarında reallığı ortaya qoyan deputatlar tənqid edilməməlidir:
“Bu gün hər hansı yüksək ranqlı məmurun adı çəkilirsə, niyə qıcıq olmalıyıq? Həmin məmur tutduğu vəzifəyə ona görə təyin olunub ki, xalqa xidmət etsin. Layiqli xidmət edə bilməyənlərin o kürsünü zəbt etməyə haqqı yoxdur”.
MMP sədr müavini qeyd edib ki, yeni parlamentdə fikir ayrılıqları çoxdur:
“Torpaqları işğalda olan bir azərbaycanlı olaraq bizi maraqlandıran ən vacib məsələ Qarabağ problemidir. Bu ümummilli məsələdə deputatlar da həmrəy olmalıdırlar. Bilməlidirlər ki, müdafiə etdikləri məmurlar o kresloda əbədi qalmayacaqlar”.
K.İsmayılova hesab edir ki, bu gün parlamentdə haqq söz sahibini tənqid edənlər məhz xalq tərəfindən seçilməyənlərdir:
“Necə deyərlər, hazıra nazir olduqlarından xalqın problem ilə deyil, dəstəkləndikləri məmurların maraqlarından çıxış edirlər”.(versus.az)