Mingəçevirdə qətl törətməkdə təqsirləndirilən Ənvər Umudovun cinayət işi üzrə məhkəmə prosesi başlayıb.
Demokrat.az xəbər verir ki, Şəki Ağır Cinayətlər Məhkəməsində hakim Bilal Məmmədovun sədrliyi ilə baş prosesdə prokuror ittiham aktını elan edib.
İttihama görə, ötən il iyunun 25-də Mingəçevir şəhərinin Borçalı bağlar sahəsində prada yaşayan Ənvər Umudov evində münaqişə zəminində həmyerlisi olan tanışı, əvvəllər məhkum olunmuş Akif İbrahimovu tüfəngdən açdığı atəşlə qətlə yetirib.
Dərhal şəhərin polis və prokurorluq orqanlarının əməkdaşları hadisə yerinə gəlib, müvafiq tədbirlər həyata keçirilib.
İstintaq və əməliyyat-axtarış tədbirləri nəticəsində qəsdən adam öldürməkdə şübhəli bilinən Ənvər Umudov saxlanılıb. Ondan cinayəti törədərkən istifadə etdiyi müvafiq sənədləri olan “İJ-16” markalı tüfəng götürülüb.
Məlum olub ki, ev sahibi Ənvər Umudov hadisə baş verən günü evində içki məclisi qurub. O, içki məclisinə tanışı Akif İbrahimovu dəvət edib.
Tanışlar yeyib-içəndən sonra sərxoş olublar. Bu zaman onların sözlərin bir-birlərinə xoş gəlməyib. Dəfələrlə məhkum olunan Akif İbrahimov həbsdə olduğu müddətdə "palajenya"ya nəzarət etdiyini deyib. Ənvər Umudov isə onun bu sözlərinə təhqiredici formada cavab verib.
Bundan əsəbləşən Akif İbrahimov isə onu döyüb. Bu vaxt Ənvər Umudov evində saxladığı tüfəngi götürərək, qonağını güllələyib.
İstintaq orqanı tərəfindən Ənvər Umudovun barəsində Cinayət Məcəlləsinin 120.2.3-cü (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürmə), 120.2.7-ci (iki və ya daha çox şəxsi öldürmə) maddələri ilə ittiham elan edilib.
Daha sonra ifadə verən təqsirləndirilən Ənvər Umudov elan olunmuş ittiham üzrə özünü qismən təqsirli bilib.
Növbəti proses aprelin 6-da davam edəcək.
Fariz Məlikli
