Milli Məclisin plenar iclasında “Əmanətlərin tam sığortalanması haqqında” Qanuna dəyişiklik birinci oxunuşda müzakirəyə çıxarılıb.
Demokrat.az XəzərXəbər-ə istinadla xəbər verir ki, qanun layihəsində əmanətlərin tam sığortalanması müddətinin 9 ay, bu il dekabrın 4-dək uzadılması nəzərdə tutulur.
Qanun layihəsinin müzakirəsi zamanı deputat Vahid Əhmədov bildirib ki, müddətin 9 ay uzadılması heç bir nəticə verməyəcək:
“Burada Prezidentə müraciət edirəm ki, bu qanun layihəsinin müddəti ən az 3 il uzadılsın. Komitədə müzakirələr olmadığı üçün bu məsələni qaldıra bilməmişəm. Amma bu, çox ciddi məsələdir. Hazırda sənədə təklif olunan 9 ay müddəti heç bir nəticə verməyəcək. Bu, insanlarımızda müəyyən anlaşılmazlıqlar yaradacaq”.
Komitəsinin sədri Tahir Mirkişili deyib ki, qanun əsas məqsədi əmanətlərin qorunması ilə bağlıdır:
“Bu nə dollar, nə də əmanətlərin başqa valyutaya çevrilməsi ilə əlaqədardır. 9 ay həm də ona görədir ki, ilin sonuna qədər əhatə etsin, sonra yeni mexanizmlər qurulacaq. Əmanətlərin orta müddəti 1 ildir. Odur ki, müddətin 9 ay uzadılması keçərlidir”.
Məsələ müzakirə olunduqdan sonra səsverməyə çıxarılaraq birinci oxunuşda qəbul edilib.
