95 saylı Tərtər Seçki Dairəsindən deputatlığa namizəd Ayaz Abdullayevin seçicilərlə görüşü davam edir.
A.Abdullayevin Seçki Qərərgahından verilən məlumata görə, deputatlığa namizəd bu dəfə Tərtər rayonunun Köçərli və Hüsənli kəndlərində seçicilərlə bir araya gəlib.
Görüşdə A.Abdullayev bildirib ki, Tərtər gənclərinin rayonun sosial-ictimai-mədəni həyatında daha fəal iştirakının təmin olunması istiqamətində bir sıra layihələr həyata keçirmək niyyətindədir: “Eyni zamanda rayonda abadlıq işlərinin aparılması, yeni uşaq bağçalarının tikilməsi, yeni parkların salınması, kəndlərarası yolların, məktəblərin təmir-tikintisi ilə bağlı məsələlərin Mərkəzi və Yerli İcra Hakimiyyətləri qarşısında qaldırmaq fəaliyyətimin əsas istiqamətlərindən olacaq”.
Vətəndaşları dinləyən A.Abdullayev səsləndirilən problemlərin müvafiq icra strukturları qarşısında qaldıracağını, qısa zaman ərzində həllinə çalışacağını diqqətə çatdırıb.
A.Abdullayev qeyd edib ki, problemlər vətəndaş fəallığı və dəstəyi, eyni zamanda aparılan islahatlar sayəsində həll oluna bilər: “Cənab Prezidentin bu istiqamətdə mövqeyi bəllidir. Biz də onun siyasətini dəstəkləyir, yerlərdə icrasına nail olmasına çalışacağıq”.
Xatırladaq ki, A.Abdullayev Tərtər rayonu, Mamırlı kənd sakinləri ilə görüşüb. Görüşdə namizəd, seçicilərin problemlərini dinləyib. Müraciət edənlər kənddə olan bir çox problemləri diqqətə çatdırıblar. Görüşdə seçicilər 9 fevralda keçiriləcək növbədənkənar parlament seçkilərində fəal iştiraka dəvət olunublar.
Deputatlığa namizəd həmçinin rayonda nüfuz sahibi olan, dəyərli pedaqoq Vaqif Aslanovla görüşüb. A.Abdullayev müəlliminin xeyir - duasının və dəyərli məsləhətlərinin bu yolda onun üçün vacib olduğunu bildirib.
A.Abdullayevin ayrı-ayrı kəndlərdə sakinlərlə və Tərtərin nüfuzlu şəxsləri ilə görüşləri davam edir.
